რეჯეფ თაიფ ერდოღანმა უნივერსიტეტის რექტორი, რომლის დანიშვნასაც საპროტესტო აქციები მოჰყვა, თანამდებობიდან გაათავისუფლა
თურქეთის პრეზიდენტმა რეჯეფ თაიფ ერდოღანმა სტამბოლის „ბოსფორის უნივერსიტეტის“ რექტორი მელიჰ ბულუ, რომლის დანიშვნასაც საპროტესტო აქციები და ასობით ადამიანის დაკავება მოჰყვა, თანამდებობიდან გაათავისუფლა. მედიის ინფორმაციით, პრეზიდენტის განკარგულება Official Gazette-ში გამოქვეყნდა.
შეგახსენებთ, რეჯეფ თაიფ ერდოღანის მიერ მელიჰ ბულუს დანიშვნას, რომელიც 2015 წლის თურქეთის საპარლამენტო არჩევნებში მმართველი პარტია „სამართლიანობისა და განვითარების“ კანდიდატი იყო, თურქეთში საპროტესტო აქციები მოჰყვა.
მიმდინარე წლის იანვარში უნივერსიტეტის ტერიტორიაზე სტუდენტებისა და ლექტორების დაწყებულმა პროტესტმა ჯერ სტამბოლის, შემდეგ კი თურქეთის სხვა დიდი ქალაქების ქუჩებში გადაინაცვლა. პროტესტში მონაწილე სტუდენტები და ლექტორები აცხადებდნენ, რომ მელიჰ ბულუ იყო პირველი რექტორი 1980 წლის შემდეგ, რომელიც ამ თანამდებობაზე უნივერსიტეტის „გარედან“ დანიშნეს. ერდოღანმა აქციების მონაწილე სტუდენტები „ტერორისტებს“ შეადარა, მელიჰ ბულუ კი გადადგომაზე უარს აცხადებდა. საპროტესტო აქციების დროს სამართალდამცავებმა ასობით მონაწილე დააკავეს.
v-if="article.gallery" v-html="article.gallery"
