მოვუწოდებ ჩინეთს, შესაძლებელი გახადოს კორონავირუსის წარმოშობის შესახებ გამოძიების გაგრძელება, - ეს განცხადება გერმანიის ჯანდაცვის მინისტრმა იენს შპანმა ჟენევაში, ჯანდაცვის მსოფლიო ორგანიზაციის შტაბ-ბინაში გამართულ პრესკონფერენციაზე გააკეთა.

მისივე თქმით, გერმანიამ ჯანმო-ს პროგრამისთვის, ACT Accelerator, რომლის მიზანი მთელი მსოფლიოსთვის, მათ შორის დაბალი შემოსავლის მქონე ქვეყნებისთვის, ვაქცინებსა და ტესტებზე წვდომის უზრუნველყოფაა, 260 მილიონი ევრო გამოყო.

ჩინეთს კორონავირუსის წარმოშობის დადგენის მიზნით გამოძიებაში თანამშრომლობისკენ მოუწოდა ჯანდაცვის მსოფლიო ორგანიზაციის გენერალურმა დირექტორმა ტედროს ადანომ გებრეისუსმაც.

„ჩინეთს ვთხოვთ, იყოს გამჭირვალე და გახსნილი და ითანამშრომლოს. მილიონობით დაღუპულის წინაშე ვალდებულები ვართ, რომ ვიცოდეთ, რა მოხდა,“- აღნიშნა ჯანმო-ს ხელმძღვანელმა.