ფრაქცია „ქართული ოცნება“ პოლიტიკური კონტექსტის გათვალისწინებით არც ერთი ოპოზიციონერი დეპუტატის უფლებამოსილების შეწყვეტას მხარს არ დაუჭერს.
შესაბამისი განმარტება პარლამენტის რიგგარეშე სხდომაზე ფრაქციის თავმჯდომარე მამუკა მდინარაძემ გააკეთა.
მისივე თქმით, “ქართულ ოცნებას“ ანალოგიური მიდგომა აქვს დეპუტატთან: ზურაბ გირჩი ჯაფარიძესთან, ელენე ხოშტარიასთან და შალვა ნათელაშვილთან დაკავშირებით, მაგრამ თუკი მომავალში ისინი პარლამენტს მიმართავენ განცხადებით უფლებამოსილების შეწყვეტაზე, “ქართული ოცნება“ მათ მოთხოვნას მხარს დაუჭერს.
პარლამენტმა რიგგარეშე სხდომაზე 52 ოპოზიციონერი წევრისთვის უფლებამოსილების ვადამდე შეწყვეტის საკითხი განიხილა, რასაც ცოტა ხანში ეყრება კენჭი.
კონსტიტუციისა და პარლამენტის რეგლამენტის მიხედვით, პარლამენტის წევრს უფლებამოსილება ვადამდე უწყდება, თუ მორიგი სესიის განმავლობაში არასაპატიო მიზეზით სხდომების ნახევარზე მეტს არ დაესწრება.
როგორც ცნობილია, პარლამენტის ოპოზიციონერი წევრები 31 ოქტომბრის არჩევნების შედეგების გაპროტესტების მიზნით, მეათე მოწვევის პარლამენტის მუშაობაში რამდენიმე თვე არ მონაწილეობდნენ. საპროცედურო საკითხთა და წესების კომიტეტმა დეტალურად დათვალა მათ მიერ გაცდენილი სხდომების რაოდენობა, მათ შორის, საპატიო და არასაპატიო გაცდენები და თითოეულ დეპუტატთან დაკავშირებით შესაბამისი დასკვნა მოამზადა.