თხუთმეტი დიპლომატიური მისია და ნატო-ს წარმომადგენელი ქაბულში ერთობლივ განცხადებას ავრცელებენ და თალიბებს თავდასხმების შეწყვეტისკენ მოუწოდებენ.
„ყურბან-ბაირამის დღესასწაულზე თალიბებმა სამუდამოდ უნდა დაყარონ იარაღი და აჩვენონ მსოფლიოს სამშვიდობო პროცესისადმი მათი ერთგულება”, - ნათქვამია ერთობლივ განცხადებაში.
დიპლომატიური მისიები ასევე გმობენ უფლებების დარღვევებს, მაგალითად, სკოლებისა და მედიასაშუალებების დახურვის მცდელობებს, რასაც, მედიის ინფორმაციით, ადგილი აქვს იმ ტერიტორიებზე, რომლებიც თალიბებმა ბოლო დროს ჩაიგდეს ხელში.
ერთობლივ განცხადებას მხარი დაუჭირა ავსტრალიამ, კანადამ, ჩეხეთმა, დანიამ, ფინეთმა, საფრანგეთმა, გერმანიამ, იტალიამ, იაპონიამ, კორეამ, ნიდერლანდებმა, ესპანეთმა, შვედეთმა, ბრიტანეთმა, ევროკავშირის დელეგაციამ და შეერთებულმა შტატებმა, ასევე ნატო-ს სამოქალაქო წარმომადგენელმა.
ცნობისათვის, ბოლო წლებში ყურბან-ბაირამის დღესასწაულის პერიოდში თალიბები ცეცხლის შეწყვეტის შესახებ განცხადებას აკეთებდნენ, თუმცა წელს მათ ცეცხლის შეწყვეტა არ გამოუცხადებიათ.
ავღანეთში უცხო ქვეყნების ძალების გაყვანის პროცესის დაწყების შემდეგ სამთავრობო ძალების წარმომადგენლებსა და თალიბებს შორის შეტაკებებმა და ძალადობის ფაქტებმა მნიშვნელოვნად იმატა. თალიბებმა ძალაუფლების დასაბრუნებლად ძალისხმევა გააძლიერეს. მათი მტკიცებით, ამჟამად ქვეყნის ტერიტორიის უდიდეს ნაწილს აკონტროლებენ.