თურქეთის პრეზიდენტის, რეჯეფ თაიფ ერდოღანის განცხადებით, ანკარა გააგრძელებს ძალისხმევას ჩრდილოეთ კვიპროსის საერთაშორისოდ აღიარებისთვის.
„ჩვენ ყველა შესაძლო ძალისხმევას მივმართავთ, რათა უზრუნველვყოთ ჩრდილოეთ კვიპროსის თურქული რესპუბლიკის რაც შეიძლება სწრაფად აღიარება“, - განაცხადა ერდოღანმა.
მან ხაზი გაუსვა, რომ კვიპროსელი თურქების ერთადერთი მოთხოვნა კვიპროსის საკითხზე საერთაშორისო მოლაპარაკებებში არის „მათი სუვერენული სახელმწიფო სტატუსის აღიარება“.
„ყველა სხვა შეთავაზება და წინადადება აღარ მოქმედებს“, - აღნიშნა ერდოღანმა. თურქული მედიის ცნობით, კიდევ ერთ ინტერვიუში ერდოღანმა ჟურნალისტებს განუცხადა, რომ კვიპროსის რესპუბლიკის ნატოში შესვლა ვერანაირ გარემოებებში ვერ მოხდება, ვიდრე თურქეთი ამაზე თანხმობას არ განაცხადებს. „თურქეთში დღეს აღარ არის ის ხელისუფლება, როგორიც იყო მაშინ, როცა ნატოში საბერძნეთი მიიღეს. დღეს ჩვენ ვართ და ისინი თურქეთის ვეტოს გვერდს ვერ აუვლიან“, - აღნიშნა ერდოღანმა.