გერმანიის კანცლერი ანგელა მერკელი აცხადებს, რომ კორონავირუსით დაინფიცირების შემთხვევების „ექსპონენციალური ზრდით" შეშფოთებულია.
კანცლერი მოქალაქეებს ვაქცინაციისკენ მოუწოდებს და ურჩევს, სხვების დარწმუნებასაც შეეცადონ.
„ინფიცირების მაჩვენებლები კვლავ იზრდება და აშკარა და შემაშფოთებელი დინამიკაა. ყოველი ვაქცინაცია ცხოვრების ნორმალური რეჟიმის დაბრუნებისკენ წინ გადადგმული ნაბიჯია“, - აღნიშნა მერკელმა.
მისი თქმით, მომდევნო ორი კვირის განმავლობაში შემთხვევები შესაძლოა, გაორმაგდეს და უფრო მკაცრი შეზღუდვების ხელახლა დაწესება გახდეს საჭირო.
ცნობისათვის, ბოლო დღეების განმავლობაში გერმანიაში კოვიდ 19-ით ინფიცირების შემთხვევები მნიშვნელოვნად იზრდება, რასაც „დელტა“ ვარიანტის გავრცელებას უკავშირებენ. ქვეყანაში, გასული დღის განმავლობაში, 1 890 ახალი შემთხვევა გამოვლინდა. ბოლო შვიდი დღის განმავლობაში ავადობის კოეფიციენტმა ყოველ 100 000-ს მოსახლეზე 12.2-ს მიაღწია მაშინ, როცა ეს მაჩვენებელი ივლისის დასაწყისში 4.9 იყო.