ტუნისში დაწყებული მასობრივი საპროტესტო აქციების ფონზე, პრეზიდენტმა კაის საედმა ქვეყნის პრემიერ-მინისტრი თანამდებობიდან გადააყენა და პარლამენტის მუშაობა შეაჩერა, - ინფორმაციას BBC-ი ავრცელებს.

ათასობით მოქალაქე, რომელიც მთავრობას პანდემიასთან არასათანადოდ გამკლავების გამო აკრიტიკებდა, ტუნისის ქუჩებში გამოვიდა და პრემიერ-მინისტრის გადადგომა და პარლამენტის დაშლა მოითხოვა. მომიტინგეები მმართველი პარტიის ოფისებში შეიჭრნენ და კომპიუტერები გაანადგურეს. პარტიის ერთ-ერთ შტაბბინას კი ცეცხლი წაუკიდეს.

სამართალდამცავებმა მომიტინგეების წინააღმდეგ ცრემლსადენი გაზი გამოიყენეს და რამდენიმე პირი დააკავეს.

ტუნისის პრეზიდენტის მტკიცებით პრემიერ-მინისტრის გადაყენებისა და პარლამენტის დათხოვნის მიზანი ქვეყანაში მშვიდობის დამყარება იყო, თუმცა ოპონენტები პრეზიდენტის ამ გადაწყვეტილებას სახელმწიფო გადატრიალებად აფასებენ.