კახეთში, გვიან ღამით ძლიერმა ქარმა მრავალწლიანი ხეები მოგლიჯა. ძირითადად უამინდობა იყო ლაგოდეხისა და თელავის მუნიციპალიტეტებში.

ლაგოდეხში, თავისუფლების ქუჩაზე ძლიერმა ქარმა ორი ხე წააქცია. შედეგად დაზიანდა იქვე მდგომი ავტომობილები, თუმცა შემთხვევის დროს არავინ დაშავებულა.

სტიქიის დროს ასევე დაზიანდა ელექტროგადამცემი ხაზები, რის გამოც მოსახლეობის ნაწილს დენის მიწოდება შეუწყდა.

ადგილობრივ ხელისუფლებაში აცხადებენ, რომ დაზიანებული ელექტროგადამცემი ხაზების აღდგენით სამუშაოებში შესაბამისი სამსახური ჩართულია.