ლოკარნოს საერთაშორისო კინოფესტივალის საკონკურსო სექციაში Concorso Cineasti del presente ელენე ნავერიანის სრულმეტრაჟიანი მხატვრული ფილმი “სველი ქვიშა” იქნება წარმოდგენილი. ეროვნული კინოცენტრის ცნობით, ფილმის მსოფლიო პრემიერა 11 აგვისტოს გაიმართება. “სველი ქვიშა” საქართველო-შვეიცარიის კოპროდუქციაა.

მათივე ცნობით, ლოკარნოში ასევე ნახავენ სალომე ჯაშის არაერთი საერთაშორისო ჯილდოს მფლობელ ფილმს “მოთვინიერება”, რომლის მსოფლიო პრემიერა სანდენსის საერთაშორისო კინოფესტივალზე გაიმართა. იგი შვეიცარია-გერმანია-საქართველოს კოპროდუქციაა. ლოკარნოში ფილმის ჩვენება 8 აგვისტოს შედგება.

ლოკარნოს საერთაშორისო კინოფესტივალი 4 აგვისტოს გაიხსნება.

კინოფესტივალი შვეიცარიის ქალაქ ლოკარნოში 1946 წლიდან იმართება. ქართული ფილმები ლოკარნოში არაერთხელ უჩვენებიათ. ბოლო წლებში კინოფესტივალის მთავარი ჯილდო “ოქროს ლეოპარდი” ორმა ქართველმა რეჟისორმა მოიპოვა – ანა ურუშაძემ საუკეთესო დებიუტისთვის (ფილმი “საშიში დედა”) და დავით ფირცხალავამ მოკლემეტრაჟიანი ფილმისთვის “მამა”.