ლიეტუვა უარყოფს ბელარუსის მხარის მიერ გავრცელებულ ინფორმაციას, თითქოს, ლიეტუვას საზღვრიდან გაბრუნებული ერაყელი მიგრანტი ცემით გარდაცვლილი იპოვეს. ლიეტუვას შინაგან საქმეთა სამინისტრომ ამ ინფორმაციას „ჰიბრიდული ომის“ ნაწილი უწოდა.

„ეს არის ჰიბრიდული ომის მეთოდი, დეზინფორმაცია. გასულ ღამეს საზღვარზე ინციდენტი ან ძალის გამოყენება არ მომხდარა“, - აცხადებენ ლიეტუვას შსს-ში.

მანამდე, ბელარუსის უშიშროების საბჭოს ხელმძღვანელმა ინფორმაცია გაავრცელა, რომ გამოძიება დაიწყო ერაყელი მიგრანტის გარდაცვალების საქმეზე, რომელიც, მათი მტკიცებით, ისე იყო ნაცემი, რომ ბელარუსმა მესაზღვრეებმა ვეღარ გადაარჩინეს. ლიეტუვას ხელისუფლება ბოლო პერიოდში წუხილს გამოთქვამს, რომ ბელარუსიდან უკანონო მიგრაცია გაიზარდა. მათი შეფასებით, ამ გზით მინსკი ევროკავშირს მის წინააღმდეგ დაწესებული სანქციების გამო სჯის.