ავსტრალიის ქალაქებში მელბურნსა და სიდნეიში გამართულ „ლოქდაუნის“ საწინააღმდეგო აქციებზე სამართალდამცავებმა ასობით დემონსტრანტი დააკავეს.
ამასთან, მედიის ინფორმაციით, პოლიციასა და მომიტინგეებს შორის შეტაკებების შედეგად რამდენიმე სამართალდამცავი დაშავდა და 7 მათგანი ჰოსპიტალიზებულია.
მელბურნში სამართალდამცავებმა აქციის დასაშლელად ე.წ. წიწაკის სპრეი გამოიყენეს და 218 ადამიანი დააკავეს. თითოეულ დაკავებულს საზოგადოებრივი წესრიგის დარღვევის გამო 5 452 ავსტრალიური დოლარის (3 900 აშშ დოლარი) ოდენობის ჯარიმა ემუქრება.
ამასთან, საპროტესტო აქცია გაიმართა ახალი სამხრეთი უელსის შტატის დედაქალაქ სიდნეიშიც, სადაც 260-ზე მეტი პირი დააჯარიმეს.
ცნობისათვის სიდნეიში, რომელიც სიდიდით მეორე ქალაქია ავსტრალიაში, „დელტა“ ვარიანტით დაინფიცირების შემთხვევების ზრდის გამო 2 თვეზე მეტია მკაცრი „ლოქდაუნია“ დაწესებული. ვიქტორიას შტატის პრემიერმა დენიელ ენდრიუსმა კი „ლოქდაუნი“, რომელიც აქამდე მხოლოდ დედაქალაქ მელბურნში იყო დაწესებული, მთელს შტატში გამოაცხადა.