ყაზახეთში, ჟამბილის ოლქში, სამხედრო საწყობში გაჩენილი ხანძრის შედეგად ოთხი სამხედრო მოსამსახურე დაიღუპა, - ინფორმაციას მედია საშუალებები ყაზახეთის თავდაცვის მინისტრ ნურლან ერმეკბაევზე დაყრდნობით ავრცელებენ.
„სამწუხაროდ, ხანძრის შედეგებთან გამკლავების დროს ოთხი სამხედრო მოსამსახურე დაიღუპა,“- განაცხადა მინისტრმა.
ამასთან, გავრცელებული ინფორმაციით, ამ დრომდე ეძებენ რამდენიმე დაკარგულს, მათ შორის საგანგებო სიტუაციების სამსახურის რამდენიმე თანამშრომელს.
ცნობისათვის, სამხედრო საწყობში ხანძარი გუშინ საღამოს გაჩნდა, რამაც რამდენიმე აფეთქება გამოიწვია. დაშავებულია 88 ადამიანი, მათ შორის 28 ჰოსპიტალიზებულია. მედიის ინფორმაციით, 6 დაშავებულის მდგომარეობა მძიმეა.