ჯანდაცვის სამინისტრომ ახალი პროექტი დაიწყო, რომელიც ავტობუსებში ვაქცინაციის ცენტრების განთავსებას გულისხმობს. როგორც ჯანდაცვის მინისტრმა, ეკატერინე ტიკარაძემ ჟურნალისტებს განუცხადა, მსგავსი ცენტრები განთავსდება ვარკეთილში, გლდანში და სადგურის მოედნის ტერიტორიაზე.

„ახალი პროექტი დავიწყეთ, რომელიც გულისხმობს ავტობუსებში ვაქცინაციის ცენტრების განთავსებას. ეს საერთაშორისო პრაქტიკა გახლავთ უკვე, ევროპაში მრავალი დაბრენდილი ავტობუსია, სადაც მოქალაქეები მომსახურებას იღებენ და მათთვის კუთვნილი ვაქცინა ხელმისაწვდომია. ჩვენ გადავწყვიტეთ, რომ თბილისში, პირველ ეტაპზე დაგვეწყო 3 ავტობუსით, ამისთვის გამოვკვეთეთ ის რაიონები, სადაც ვაქცინაციის პუნქტებზე ყველაზე ნაკლები ხელმისაწვდომობა იყო. მივიღეთ გადაწყვეტილება, რომ ვარკეთილში, გლდანში და სადგურის მოედნის ტერიტორიაზე განვათავსებთ 3 ავტობუსს. ჯამში დაგეგმილია 10 ავტობუსის განთავსება, ისინი იქნებიან დაბრენდილი ავტობუსები, სადაც მოქალაქე მიიღებს ყველა იმ საჭირო, უსაფრთხო მომსახურებას ვაქცინაციასთან დაკავშირებით, რასაც ის კლინიკასა და პოლიკლინიკაში მიიღებდა. იქნება რეგისტრაცია, რომელიც პორტალზე ონლაინ აისახება, შემდეგ მოქალაქე აირჩევს თავის კუთვნილ ვაქცინას, რომელზეც გადაწყვეტილებას მიიღებს. საჭიროების შემთხვევაში, მას ადგილზევე გაეწევა ყველა საჭირო სამედიცინო დახმარება“,- განაცხადა ტიკარაძემ.