გაერო-ს უშიშროების საბჭომ ავღანეთის საკითხზე რეზოლუცია მიიღო. მედიის ინფორმაციით, დოკუმენტი „თალიბანს“ მოუწოდებს, უზრუნველყოს იმ ადამიანების უსაფრთხოდ გასვლა, რომლებიც ავღანეთის დატოვებას ცდილობენ.

დოკუმენტის მიხედვით, უშიშროების საბჭოს წევრები მოუწოდებენ „თალიბანს“, შეიქმნას უსაფრთხო ზონა, იმისთვის, რომ ავღანელებმა 31 აგვისტოს შემდეგ ქაბულის აეროპორტამდე უსაფრთხოდ მისვლა შეძლონ.

რეზოლუცია ასევე მოთხოვს, რომ ავღანეთის ტერიტორია არ იყოს გამოყენებული სხვა ქვეყნისთვის საფრთხის შესაქმნელად ან არ გადაიქცეს ტერორისტული დაჯგუფებების ბუდედ.

გაერთიანებული სამეფოსა და საფრანგეთის მიერ წარდგენილ რეზოლუციას უშიშროების საბჭოს 13-მა წევრმა დაუჭირა მხარი, რუსეთმა და ჩინეთმა თავი შეიკავეს.

უშიშროების საბჭოს სხდომის გამართვამდე საფრანგეთის პრეზიდენტმა, ემანუელ მაკრონმა განაცხადა, რომ ევაკუაციის გაგრძელების საკითხზე „თალიბებთან“ მოლაპარაკებები მიმდინარეობს.