ისრაელი აცხადებს, რომ იერუსალიმში საკონსულოს ხელახლა გახსნასთან დაკავშირებით შეერთებული შტატების გეგმა „ცუდი იდეაა" და შესაძლოა პრემიერ-მინისტრს ნაფტალი ბენეტის ახალი მთავრობის დესტაბილიზაციის მიზეზი გახდეს.

„ვფიქრობთ, რომ ეს ცუდი იდეაა. იერუსალიმი მხოლოდ და მხოლოდ ისრაელის სუვერენული დედაქალაქია და, შესაბამისად, ჩვენ არ ვფიქრობთ, რომ ეს კარგი იდეაა. ვიცით, რომ ბაიდენის ადმინისტრაცია სხვაგვარად უყურებს ამ საკითხს, მაგრამ რადგან ეს ისრაელში ხდება, დარწმუნებულები ვართ, რომ ისინი ძალიან ყურადღებით მოგვისმენენ,“- აღნიშნა ისრაელის საგარეო საქმეთა მინისტრმა იაირ ლაპიდმა დღეს გამართულ პრესკონფერენციაზე.

ცნობისათვის, აშშ-ის ყოფილი პრეზიდენტის დონალდ ტრამპის ადმინისტრაციამ იერუსალიმთან დაკავშირებით ისრაელის მიმართ მხარდაჭერის გამოხატვის ნიშნად აშშ-ის საელჩო თელ-ავივიდან იერუსალიმში გადაიტანა და საკონსულოც ამ მისიას მიაკუთნა. აშშ-ის ამ ნაბიჯს პალესტინელების მხრიდან პროტესტი მოჰყვა, რადგან ისინი იერუსალიმს მომავალი სახელმწიფოს დედაქალაქად განიხილავენ.

პრეზიდენტმა ჯო ბაიდენმა პირობა დადო, რომ აღადგენს კავშირებს პალესტინელებთან, მხარდაჭერა გამოუცხადა ორი სახელმწიფოს პრინციპზე დაფუძნებულ გამოსავალს და იერუსალიმში საკონსულოს ხელახლა გახსნა დააანონსა.