შეერთებული შტატები მკაცრად გმობს რუსეთის მიერ ყირიმელი თათრების მთავარი წარმომადგენლობითი ორგანოს ლიდერის მოადგილისა და ეთნიკური ჯგუფის სულ მცირე 45 სხვა წევრის დაკავებას, - Reuters-ის ინფორმაციით, ამის შესახებ აშშ-ის სახელმწიფო დეპარტამენტის მიერ გავრცელებულ განცხადებაშია აღნიშნული.
"მოვუწოდებთ რუსეთის საოკუპაციო ხელისუფლებას, დაუყოვნებლივ გაათავისუფლოს ისინი", - ნათქვამია განცხადებაში.
აშშ-ის სახელმწიფო დეპარტამენტში მიიჩნევენ, რომ რუსეთის ხელისუფლების ეს ნაბიჯი მეჯლისისა და მისი ხელმძღვანელობის წინააღმდეგ მიმართული პოლიტიკურად მოტივირებული რეიდების, დაკავებებისა და სადამსჯელო ღონისძიებების გაგრძელებაა.
სახელმწიფო დეპარტამენტის განცხადებაში ნათქვამია, რომ ყირიმელი თათრების მეჯლისის თავმჯდომარის მოადგილე ნარიმან ძელიალოვი რუსეთის საოკუპაციო ხელისუფლებამ ყირიმში შაბათს დააკავა. დაკავებულია 45 სხვა ყირიმელი თათარიც.