გვესმის, რომ სამსახურში წასასვლელად საზოგადოებას სჭირდება სატრანსპორტო საშუალება, სკოლების გახსნა უკიდურესად მნიშვნელოვანია, მაგრამ გასული ერთი თვე ჩვენთვის იყო უდიდესი სასიცოცხლო რისკი ეპიდემიის მართვის კუთხით, - ამის შესახებ ჯანდაცვის მინისტრის მოადგილემ, თამარ გაბუნიამ სატრანსპორტო საშუალებაზე დაწესებულ შეზღუდვის შემსუბუქებასთან დაკავშირებით დასმული კითხვის საპასუხოდ განაცხადა.

გაბუნიამ აღნიშნა, რომ ახლა სასიცოცხლო რისკების წინაშე ვართ და როდესაც ეს რისკები შემცირდება, ამის შემდეგ მოხდება შეზღუდვების შემსუბუქება.

„ჩვენ დღეს ვსაუბრობდით სასიცოცხლო რისკებზე, რომლებიც უკავშირდებოდა ეპიდემიის ძალიან სწრაფად და ფართოდ გავრცელებას. როდესაც ამგვარი სასიცოცხლო ნიშნების წინაშე ვდგავართ, ეს არის უპირატესი სხვა სოციალურ და ბიზნესსაჭიროებასთან შედარებით. როგორც კი ეს რისკები შემცირდება და ამის მოლოდინი ჩვენ გვაქვს მომდევნო დღეების განმავლობაში, რა თქმა უნდა, მაშინვე იქნება ისევ ნორმალური ფუნქციონირება აღდგენილი. იმ შეზღუდვების მოხსნა მოხდება, რაც ამ სასიცოცხლო რისკებთან დაკავშირებით იქნა შემოღებული. გვესმის, რომ სამსახურში წასასვლელად საზოგადოებას სჭირდება სატრანსპორტო საშუალება, სკოლების გახსნა უკიდურესად მნიშვნელოვანია, მაგრამ გასული ერთი თვე ჩვენთვის იყო უდიდესი სასიცოცხლო რისკი ეპიდემიის მართვის კუთხით" , - განაცხადა გაბუნიამ და აღნიშნა, რომ სკოლებსა და უნივერსიტეტებში თანაბრად მნიშვნელოვანია, რომ აღდგეს სწავლა აკადემიურ გარემოში.

„ამდენად ისევ და ისევ მნიშვნელოვანია სტუდენტებისა და პედაგოგიური პერსონალის სწრაფი ვაქცინაცია. სტუდენტების ნაწილი მონაწილეობს ვაქცინაციაში, თუმცა მეტი აქტივობაა საჭირო“, - აღნიშნა გაბუნიამ.