ავღანეთში ასობით სამედიცინო დაწესებულებას დახურვა ემუქრება, რადგან დასავლელ დონორებს, რომლებიც მათ აფინანსებენ, ეკრძალებათ „თალიბანის“ ახალ მთავრობასთან ურთიერთობა, - ამის შესახებ ჯანდაცვის მსოფლიო ორგანიზაციის წარმომადგენელმა რიკ ბრენანმა განაცხადა.

მისივე თქმით, ქვეყნის მასშტაბით 2 300 სამედიცინო დაწესებულების დაახლოებით 90%-ს მიმდინარე კვირაში დახურვა მოუწევს.

"ჯანდაცვის დაწესებულებებში ოპერაციების დიდი ნაწილის დაპაუზება მოგვიწევს. ზოგიერთი შეფასებით მათი დაახლოებით 90%-ი ფუნქციონირებას კვირის ბოლომდე შეწყვეტს და ეს დაკავშირებული იქნება ავადმყოფობისა და სიკვდილიანობის გაზრეიდლ მაჩვენებელთან", - აღნიშნა ბრენანმა.

მან ხაზი გაუსვა, რომ ჯანმო დანაკლისის შევსებას 500 სამედიცინო ცენტრის მომარაგებით, აღჭურვითა და დაფინანსებით ცდილობს. სამედიცინო მარაგები იგზავნება ქალაქ მაზარ-ი-შარიფის გავლით და ჯანმო ასევე იკვლევს სახმელეთო ვარიანტებს, კერძოდ მარაგის მიწოდების შესაძლებლობას პაკისტანიდან სატვირთო მანქანების საშუალებით.