ჩილეს ჯანდაცვის მარეგულირებელმა ჩინური კომპანია „სინოვაკის“ ვაქცინის, „კორონავაკის“, 6 წლის ზემოთ ასაკის ბავშვებში გამოყენება დაამტკიცა,- ინფორმაციას სააგენტო Reuters-ი ავრცელებს.

„ეს შესანიშნავი ამბავია სკოლის ასაკის ბავშვებისთვის და მათთვის, ვინც ვაქცინაციის პროგრამის წინა გეგმებში არ შედიოდა“, - განაცხადა ჩილეს ჯანდაცვის მინისტრმა, ენრიკე პარისმა.

აღსანიშნავია, რომ ჩილემ მიმდინარე წლის მაისში 12 წლის ზემოთ ასაკის ბავშვებში „ფაიზერის“ ვაქცინის გამოყენება დაამტკიცა და იმ დროიდან ვაქცინის მინიმუმ ერთი დოზა 654 053-მა ბავშვმა მიიღო.

ჩილეში, სადაც 19 მილიონამდე ადამიანი ცხოვრობს, 13 მილიონი მოქალაქე უკვე სრულადაა ვაქცინირებული. ვაქცინაცია, ძირითადად, „სინოვაკის“ ვაქცინით მიმდინარეობს და დღემდე გამოყენებულია „კორონავაკის“ 19.49 მილიონი დოზა. ქვეყანაში, ბოლო კვირების განმავლობაში, ინფიცირების მაჩვენებელმა მნიშვნელოვნას იკლო და გასულ დღეს მხოლოდ 434 ახალი შემთხვევა გამოვლინდა. ჩილეში, პანდემიის დაწყების დროიდან ინფიცირების 1.6. მილიონი შემთხვევაა დადასტურებული, აქედან 37 000-ზე მეტი ადამიანი გარდაიცვალა.