ჰოსპიტალიზებული კოვიდპაციენტების 90%-ს არავაქცინირებული, ან ვაქცინის მხოლოდ ერთი დოზით აცრილი პირები შეადგენენ, - ამის შესახებ თურქეთის ჯანდაცვის მინისტრმა ფაჰრეთინ კოჩამ განაცხადა.

მან ასევე ხაზი გაუსვა, რომ იმ მოქალაქეებმა, რომლებიც კოვიდ 19-ის საწინააღმდეგო ვაქცინის ორი დოზით აიცრნენ, მეორე დოზის გაკეთებიდან 5-6 თვეში ე.წ. „ბუსტერ“ დოზა უნდა მიიღონ.

ამასთან, ფაჰრეთინ კოჩას ინფორმაციით, თურქეთში წარმოებული ვაქცინა „თურქოვაკი“ დამტკიცების მოლოდინშია.

“ჩვენი წარმოების კოვიდ-19-ის საწინააღმდეგო ვაქცინა „თურქოვაკი“ გადაუდებელი გამოყენებისთვის დამტკიცებას ელოდება და ჩვენი ინფრასტრუქტურა მზად არის მასობრივი წარმოებისთვის. საზოგადოებრივი ჯანდაცვის ორგანოების მიერ ვაქცინის დამტკიცების შემთხვევაში მისი სერიული წარმოება ოქტომბერში დაიწყება,“- აღნიშნა კოჩამ.

თურქეთის ჯანდაცვის სამინისტროს მონაცემებით, ქვეყანაში სრულად ვაქცინირებულია 39.5 მილიონი ადამიანი.