საფრანგეთში მსახიობ ჟან პოლ ბელმონდოს მასშტაბური და ემოციური გამოსამშვიდობებელი ცერემონია გაიმართა. სამოქალაქო პანაშვიდი ფილმ „პროფესიონალის“ საუნდტრეკის, ენიო მორიკონეს კომპოზიციის, Chi Mai-ს ფონზე წარიმართა. კომპოზიცია დაკრძალვის ცერემონიალის დროს რესპუბლიკის გვარდიის ბენდმა შეასრულა. ბელმონდოს ფრანგი ხალხი ტაშით დაემშვიდობა, რომელიც მთელი ცერემონიალის დროს უწყვეტად ისმოდა.

სამოქალაქო პანაშვიდზე Les Invalides სასახლის ეზოში ათასამდე ადამიანი შეიკრიბა, მათ შორის იყვნენ პოლიტიკოსები, ცნობილი სახეები და სპორტის ვარსკვლავები. ცერემონიალს დაესწრო საფრანგეთის პრეზიდენტი ემანუელ მაკრონი, რომელმაც გამოსამშვიდობებელი სიტყვა წარმოთქვა.

„ჩვენ გვიყვარს ბელმონდო, რადგან ის ისეთივეა, როგორც ჩვენ. ის ფრანგული კინოს შეუდარებელი ვარსკვლავია,“- აღნიშნა მაკრონმა, რომელიც მსახიობს შემდეგი სიტყვების დაემშვიდობა: „ნახვამდის, ბებელ“.

ათასობით ადამიანი საყვარელ მსახიობთან გამოსამშვიდობებელ ცერემონიალს გარეთ დამონტაჟებულ დიდ ეკრანებზე ადევნებდა თვალს.

ფრანგი მსახიობი ჟან-პოლ ბელმონდო 6 სექტემბერს, 88 წლის ასაკში გარდაიცვალა. მას დღეს დაკრძალავენ. დაკრძალვა მხოლოდ ოჯახისა და ახლობლების გარემოში ჩატარდება.