ჩინეთის პრეზიდენტმა სი ძინპინმა გერმანიის კანცლერ ანგელა მერკელთან სატელეფონო საუბრისას გერმანიას მოუწოდა, ხელი შეუწყოს ჩინეთის მიმართ "სწორი" პოლიტიკის გატარებას, - Reuters-ის ინფორმაციით, ამის შესახე ჩინეთის სახელმწიფო მედია იუწყება.

მათივე ცნობით, ჩინეთის ლიდერმა ასევე იმედი გამოთქვა, რომ ინვესტიციების შესახებ ევროკავშირი-ჩინეთის ყოვლისმომცველი შეთანხმების რატიფიცირება მალე განხორციელდება.

ჩინური მედიის ინფორმაციით, მხარეებმა ავღანეთის საკითხზეც ისაუბრეს და სი ძინპინმა განაცხადა, რომ ჩინეთი იმედოვნებს, რომ იმუშავებს გერმანიასთან და საერთაშორისო საზოგადოებასთან ავღანეთში მშვიდობისა და სტაბილურობის მიმართულებით.

შეგახსენებთ, მანამდე ცნობილი გახდა, რომ აშშ-ის პრეზიდენტმა ჯო ბაიდენმა და ჩინეთის პრეზიდენტმა სი ძინპინმა სატელეფონო საუბარი გამართეს. თეთრი სახლის ინფორმაციით, პრეზიდენტებმა ხაზი გაუსვეს, რომ საჭიროა პასუხისმგებლობის გამოჩენა იმისთვის, რომ ორ ქვეყანას შორის კონკურენცია კონფლიქტში არ გადაიზარდოს.