ნათია თურნავა - გურიაში აქტიურად გავაგრძელებთ როგორც გაზიფიცირების პროცესს, ასევე ეკო და აგროტურიზმის ხელშეწყობის სახელმწიფო პროგრამებს

გურიაში აქტიურად გავაგრძელებთ როგორც გაზიფიცირების პროცესს, ასევე ეკო და აგროტურიზმის ხელშეწყობის სახელმწიფო პროგრამებს, - ამის შესახებ ეკონომიკის და მდგრადი განვითარების მინისტრმა ნათია თურნავამ გურიის რეგიონში მუნიციპალიტეტებში მოსახლეობასთან შეხვედრების შემდეგ განაცხადა.

„გურიის რეგიონის სამივე მუნიციპალიტეტში შეხვედრები გვქონდა მოსახლეობასთან, სასიხარულოა, რომ ვხედავთ ადამიანებისგან დიდ ნდობას, მზადყოფნას, რომ მხარი დაუჭირონ ჩვენი გუნდის კანდიდატებს, არიან მადლიერები და ეს არის ჩვენთვის ძალიან დიდი პასუხისმგებლობა, დიდი ნდობა, რომელსაც ჩვენ აქამდეც ვამართლებდით და მომავალშიც გავამართლებთ" , - განაცხადა თურნავამ.

მინისტრის ინფორმაციით, გურიაში აქტიურად მიმდინარეობს გაზიფიკაცია და ორმოცამდე დასახლებული პუნქტი, სადაც დაახლოებით 17 000 ოჯახი ცხოვრობს, მიმდინარე სამწლიან პერიოდში გაზიფიცირდა. „ამ ოჯახების უმეტესობა ან უკვე სარგებლობს ბუნებრივი აირით, ან ქსელზე დაერთდება ამ დღეებში. გაზიფიცირების პროცესს ვაგრძელებთ და მოსახლეობას მივეცით პირობა, რომ უახლოესი სამწლიანი გეგმის ფარგლებში, მაგალითად, ოზურგეთის, ლანჩხუთის მუნიციპალიტეტში სოფლები ასი პროცენტით იქნება გაზიფიცირებული. ასევე ძალიან აქტიურად გავაგრძელებთ სამუშაოებს ჩოხატაურის მუნიციპალიტეტში" - აღნიშნა ეკონომიკის მინისტრმა.

ნათია თურნავას შეფასებით, გურიაში ასევე დიდი პოტენციალია და ბევრი რამ არის გასაკეთებელი ტურიზმის განვითარების თვალსაზრისით.

„აქ არის ულამაზესი ხედები, სტუმართმოყვარე ადამიანები, ძალიან გემრიელი სამზარეულო - ეს არის სწორედ ეკოტურიზმი და აგროტურიზმი, რისთვისაც ჩვენ ახალი პროგრამა ავამოქმედეთ, ეს არის სესხის პროცენტის სუბსიდირება, გრანტები, თანაგარანტირება და ა.შ. ასევე მნიშვნელოვანი გეგმებია სოფლის მეურნეობის მიმართულებით, სადაც სულ მცირე, შვიდი მილიარდი ლარის დახარჯვას ვაპირებთ ახალი პროგრამების ფარგლებში, რაც ძალიან აქტუალურია გურიისთვის, ეს არის ლურჯი მოცვის, ასევე თხილის კულტურების განვითარების პროგრამები და ყველაფერს გავაკეთებთ, რომ გურიაში ამ მიმართულებებს ხელი შევუწყოთ" - განაცხადა ეკონომიკისა და მდგრადი განვითარების მინისტრმა.

"ქართული ოცნების" ინფორმაციით, შეხვედრებში ნათია თურნავასთან ერთად, ასევე მონაწილეობდნენ გურიის მხარეში სახელმწიფო რწმუნებული გიორგი ურუშაძე, ლანჩხუთის მერობის კანდიდატი ალექსანდრე სარიშვილი, ჩოხატაურის მერობის კანდიდატი დავით შარაშიძე, ოზურგეთის მერობის კანდიდატი ავთანდილ თალაკვაძე და მაჟორიტარი დეპუტატი ვასილ ჩიგოგიძე.

დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
ქართული პრესის მიმოხილვა 20.09.2021
თენგიზ ფხალაძე - საშიშ ფაზაში ვიმყოფებით, მსოფლიოში მიმდინარე პროცესები ყურადღების მიღმა გვრჩება, ყველაფერს ვაკეთებთ სახელმწიფოს ჩამოსაშლელად, მოწინააღმდეგეს მხოლოდ ისღა რჩება, რომ ამ პროცესში ხელი არ შეგვიშალოს
(სტერეოტიპული) წარმოდგენები ცვალებადი გარემოებების პირისპირ: იდეალიზმიდან რეალიზმისაკენ
დიდი ფასდაკლება შერჩეულ პროდუქციაზე - სექტემბრის ტოპ შეთავაზება „მიჰაუსისგან“
კომპანია “ლისი რეკრეაცია” ლისის ტბასთან დაკავშირებით ინფორმაციას ავრცელებს