ჰაიტის პრემიერ-მინისტრს, არიელ ჰენრის, ქვეყნის პრეზიდენტის, ჟოვენელ მოისეს მკვლელობაში მის შესაძლო თანამონაწილეობასთან დაკავშირებით მიმდინარე გამოძიების გამო, ქვეყნიდან გასვლა აეკრძალა.
BBC-ის ინფორმაციით, ჰაიტის პროკურატურა პრემიერისთვის ბრალდების წაყენებას გეგმავს. მკვლელობაში ეჭვმიტანილ პირთან, ჯოზეფ ფელიქს ბადიოსთან კავშირის გამო არიელ ჰენრის ახსნა-განმარტებას სთხოვენ. ჰაიტის პროკურატურის ინფორმაციით, არსებობს ჩანაწერები, რომ მკვლელობიდან რამდენიმე საათში პრემიერი ჯოზეფ ფელიქს ბადიოს ტელეფონით რამდენჯერმე ესაუბრა.
ორი დღის წინ პრემიერმა მთავარი პროკურორი ბედ-ფორდ კლოდი "სერიოზულ ადმინისტრაციულ სამართალდარღვევაში" დაადანაშაულა და თანამდებობიდან მისი გათავისუფლების შესახებ განაცხადა, თუმცა კლოდი თანამდებობაზე რჩება. გუშინ მან მოსამართლეს პრემიერ -მინისტრისათვის პრეზიდენტის მკვლელობაში შესაძლო მონაწილეობის გამო ბრალის წაყენება სთხოვა. BBC სანდო წყაროზე დაყრდნობით იუწყება, რომ პროკურორის გადაყენება პრემიერ-მინისტრის უფლებამოსილებაში არ შედის. შეგახსენებთ, ჰაიტის პრეზიდენტს ჟოვენელ მოისეს 7 ივლისს საკუთარ რეზიდენციაში თავს დაესხნენ და მოკლეს.