უზბეკეთის პრეზიდენტი შავკატ მირზიოევი ქვეყნებს თავიანთ ბანკებში ავღანეთის გაყინულ აქტივებზე ყადაღის მოხსნისკენ მოუწოდებს. შანხაის თანამშრომლობის ორგანიზაციის (SCO) შეხვედრაზე მირზიოევმა, რომლის ქვეყანა ავღანეთს ესაზღვრება, ბლოკს, ექსტრემიზმის ზრდის თავიდან აცილების მიზნით, „თალიბანთან“ მოლაპარაკებებისკენ მოუწოდა.
მისი თქმით, ავღანეთის ქონებაზე ყადაღის მოხსნა ხელს შეუწყობს ამ მიზნების მიღწევას.
”ჰუმანიტარული სიტუაციის გათვალისწინებით, გთავაზობთ, განიხილოთ უცხოურ ბანკებში ავღანეთის ანგარიშებზე ყადაღის მოხსნა,“- აღნიშნა პრეზიდენტმა.
აღსანიშნავია, რომ რუსეთის პრეზიდენტმა ვლადიმერ პუტინმა, რომელმაც შეხვედრაში მონაწილეობა ვიდეო კავშირის საშუალებით მიიღო, შანხაის თანამშრომლობის ორგანიზაციას, ქაბულთან კონტაქტების დამყარებისკენ მოუწოდა, თუმცა კონკრეტულ ნაბიჯებზე არ უსაუბრია.