სლოვაკეთში, გასული დღის განმავლობაში, კორონავირუსით ინფიცირების 902 ახალი შემთხვევა გამოვლინდა, რაც რეკორდულად მაღალი დღიური მაჩვენებელია ქვეყნისთვის აპრილის შუა რიცხვების შემდეგ, - ინფორმაციას BBC-ი ავრცელებს.
გამოცემის ცნობით, ჩატარებული ტესტების დადებითობის მაჩვენებელი 10%-მდე გაიზარდა. ამასთან, გასული 24 საათის განმავლობაში სლოვაკეთში კოვიდ 19-ს კიდევ 3 ადამიანის სიცოცხლე ემსხვერპლა, ჰოსპიტალიზებული პაციენტების რაოდენობამ კი 275 შეადგინა.
მედიკოსების ნაწილი მიიჩნევს, რომ სლოვაკეთში ვაქცინაციის შედარებით დაბალი დონის გამო ქვეყანა მომავალი თვეების განმავლობაში სახიფათო მდგომარეობაში აღმოჩნდება. ცნობისათვის, სლოვაკეთში, სადაც დაახლოებით 5.5 მილიონი ადამიანი ცხოვრობს, სრულად ვაქცინირებულია მთელი მოსახლეობის 42%.