რუსეთის ცენტრალური საარჩევნო კომისიის თავმჯდომარის, ელა პამფილოვას განცხადებით, პლატფორმა, რომელიც ონლაინ ხმის მიცემისთვის გამოიყენება, კიბერშეტევებს განიცდის და მათგან ნახევარზე მეტი აშშ-სგან მომდინარეობს.
„ჩვენი ვებ-გვერდი, რომელიც ონლაინ ხმის მიცემისთვის გამოიყენება, თავდასხმის ობიექტი გახდა. შემთხვევების 50% აშშ-დან, 25% გერმანიიდან, 20-სამხრეთ კორეიდან, ხოლო 5% კი ჩინეთიდან მოდის“, - განაცხადა ელა პამფილოვამ.
რუსეთის ცენტრალური საარჩევნო კომისიის თავმჯდომარე აღნიშნავს, რომ კიბერშეტევების რაოდენობა იზრდება საჯარო მომსახურების ვებ-გვერდზეც. მისი თქმით, ეს არის ერთგვარი მტკიცებულება, რომ მათი ბრალდებები სიმართლეს შეესაბამება და რუსეთის არჩევნები უამრავი ქვეყნის ინტერესის საგანია.
რუსეთის ფედერაციაში ხმის მიცემის პროცესი დღეს დაიწყო და სამ დღეს გაგრძელდება. 16 სექტემბერს ქვეყნის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ მოსკოვი რუსეთის არჩევნებში აშშ-ის ჩართულობას აკვირდება. როგორც დიპლომატმა აღნიშნა, რუსეთის საშინაო საქმეებში ჩარევა დაუშვებელია.
