ავსტრალიის ხელისუფლებამ მელბურნში სამშენებლო ობიექტები ორი კვირით დახურა, მას შემდეგ, რაც ქალაქში გამართული ვაქცინაციის საწინააღმდეგო აქცია ძალადობაში გადაიზარდა. მედიის ინფორმაციით, საპროტესტო აქციის მონაწილეებმა სამართალდამცავებს ბოთლები და სხვადასხვა საგნები დაუშინეს.
ხელისუფლებამ აქციის დასაშლელად სპეცრაზმი გამოიყვანა.
ვიქტორიის შტატის პოლიციის განცხადებით, დაკავებულია რამდენიმე ადამიანი. პროტესტი გამოიწვია გადაწყვეტილებამ, რომლის თანახმადაც სამშენებლო ობიექტებზე დასაქმებული ადამიანები ვალდებულები არიან, მიმდინარე კვირის პარასკევამდე კორონავირუსის საწინააღმდეგო ვაქცინის მინიმუმ ერთი დოზა გაიკეთონ.
“ჩვენ ეს სექტორი ერთი კვირით ადრე გავაფრთხილეთ.შემზარავი ქცევა ვიხილეთ სამშენებლო ობიექტებსა და ქუჩებში. ახლა ჩვენ ვიმოქმედებთ უყოყმანოდ,” - აღნიშნა სამრეწველო ურთიერთობების მინისტრმა ტიმ პალასმა.