„ქართული ოცნების" ვაკის რაიონის მაჟორიტარობის კანდიდატი გიორგი ტყემალაძე, წინასაარჩევნო კამპანიის ფარგლებში, წყნეთისა და ნუცუბიძის მეოთხე პლატოს მოსახლეობას შეხვდა.

პარტიის პრესსამსახურის ცნობით, გიორგი ტყემალაძემ მოსახლეობის მოსაზრებები მოისმინა და იმ პროექტებზე ისაუბრა, რომელთა განხორციელებაც მომდევნო ოთხი წლის განმავლობაში იგეგმება.

მისი თქმით, ერთობლივი მუშაობითა და მოსახლეობის აქტიური ჩართულობით, თბილისი უნდა გახდეს კიდევ უფრო ლამაზი და კომფორტული თანამოქალაქეებისთვის.

„ვაგრძელებთ მოსახლეობასთან შეხვედრებს, ვეცნობით მათ მოსაზრებებს და ვსაზღვრავთ იმ პრიორიტეტებს, რომლებიც ვაკის რაიონისთვის მნიშვნელოვანია. ჩვენ, ჩვენი გადაწყვეტილებებით და განხორციელებული რეფორმებით, დავამტკიცეთ, რომ გვაქვს ქალაქის განვითარების სწორი ხედვა. გამარჯვების შემდეგ კი, თქვენი მხარდაჭერით და ჩართულობით, კიდევ უფრო ბევრ და მნიშვნელოვან პროექტს განვახორციელებთ, რადგან სწორედ თქვენ ხართ ის ადამიანები, რომლებმაც ყველაზე უკეთ იცით, თუ რა სჭირდება თქვენს უბანს", - განაცხადა გიორგი ტყემალაძემ.