საფრანგეთი არ აპირებს გაერო-ს უშიშროების საბჭოში თავის მანდატზე უარის თქმას, - ამის შესახებ დღევანდელ ბრიფინგზე საფრანგეთის სახელმწიფო მდივანმა გაბრიელ ატალმა განაცხადა.

„საფრანგეთი დარჩება გაეროს უშიშროების საბჭოს მუდმივ წევრად. მანდატის სხვისთვის გადაცემის საკითხი არც არასოდეს განხილულა და არასოდეს იქნება განხილული“, - განაცხადა ატალმა.

მისი თქმით, სხვაგვარი ინფორმაცია სინამდვილეს არ შეეფერება.

მანამდე ელისეის სასახლეში ბრიტანული ტაბლოიდის მტკიცების საპირისპიროდ, განაცხადეს, რომ საფრანგეთს არავისთვის შეუთავაზებია თავისი ადგილი გაეროს უშიშროების საბჭოში.

საფრანგეთი ერთ-ერთია გაეროს უშიშროების საბჭოს მუდმივ წევრ სახელმწიფოებს შორის ამერიკასთან, დიდ ბრიტანეთთან, ჩინეთთან და რუსეთთან ერთად.