დღეს ჩვენ ვნახეთ, რომ „ქართულ ოცნებას“ ერთადერთი, რაც ამოძრავებს, ეს არის შიში. შიში ძალაუფლების დაკარგვის, შიში სკამების დაკარგვის. მათ ყველაზე კარგად იციან, რომ კარგავენ ძალაუფლებას, ისინი არიან დამარცხებულები, - ამის შესახებ პარტია „დროას” ლიდერმა თბილისის საკრებულოს თავმჯდომარეობის კანდიდატმა ელენე ხოშტარიამ განაცხადა.
ელენე ხოშტარიას თქმით, „ქართული ოცნება“ ქართველ ხალხს გვტაცებს სურვილს, რომ ვიყოთ დასავლეთის ნაწილი.
„ოპოზიცია და ჩვენი საზოგადოების უმრავლესობაა, რომელსაც არ უნდა ძალადობა, არ უნდა ჩაგვრა, არ უნდა უსამართლობა, რომელსაც უნდა მშვიდობა და რომელსაც უნდა ევროპა და განვითარება. ეს უმრავლესობა აუცილებლად გაიმარჯვებს 2 ოქტომბრის რეფერენდუმზე.
ამ დარჩენილ დღეებში, ჩვენ ვხედავთ, რომ „ქართულ ოცნებას“ შეუძლია, უდიდესი დარტყმა მიაყენოს ჩვენი ქვეყნის ინტერესებს. ჩვენ დღეს რაც ვნახეთ, ეს იყო თავდასხმა არა მხოლოდ ოპოზიციაზე, რასაც ჩვენ შეჩვეული ვართ, არამედ ევროკავშირზე. ჩვენ დღეს ვნახეთ საათნახევრის განმავლობაში ევროკავშირის საელჩოს ოფისის ბლოკირება, რაც ყველა იმ ანტიდასავლურ ნაბიჯებთან ერთად არის განაცხადი, რომ „ქართულ ოცნებას“ უნდა, რომ გამოგვტაცოს უმრავლესობის გადაწყვეტილება პროდასავლური განვითარებული საქართველოს შესახებ.
ჩვენ გამოვგლეჯთ „ქართულ ოცნებას“, ჩვენს სურვილს, რომ ვიყოთ დასავლური სამყაროს ნაწილი, რომ ჩვენს დიპლომატებს არათუ ვუსმენდეთ, არამედ ვიყოთ გვერდში და ვიცავდეთ ჩვენი ქვეყნის უსაფრთხოებას. მე დარწმუნებული ვარ, რომ 2 ოქტომბერს ეს ზუსტად ასე იქნება“, - განაცხადა ელენე ხოშტარიამ.