გერმანიის პარლამენტთან ათასობით გარემოსდაცვითი აქტივისტი შეიკრიბა და ხელისუფლებას კლიმატის ცვლილებების წინააღმდეგ უფრო აქტიური ბრძოლისკენ მოუწოდა. შეკრებილებს 18 წლის შვედმა აქტივისტმა გრეტა თუნბერგმა მიმართა და მოქალაქეებს მოუწოდა, პოლიტიკოსებს კლიმატის ცვლილებთან გამკლავების მიზნით ქმედითი ნაბიჯების გადადგა მოსთხოვონ.
„უნდა გავაგრძელოთ ქუჩებში გამოსვლა და უნდა მოვთხოვოთ ჩვენს ლიდერებს, მიიღონ რეალური ზომები კლიმატის ცვლილებებთან გასამკლავებლად. არასოდეს უნდა დანებდეთ. ახლა უკან დახევის დრო არ არის,“- აღნიშნა თუნბერგმა.
შეგახსენებთ, გერმანიაში ხვალ საყოველთაო არჩევნები იმართება. კლიმატის ცვლილება წინასაარჩევნო კამპანიის დროს ერთ-ერთი ძირითადი საკითხი იყო.
გერმანიის პარლამენტთან შეკრებილმა აქტივისტებმა არჩევნებს "საუკუნის კენჭისყრა" უწოდეს და განაცხადეს, რომ მომავალი მთავრობის გადაწყვეტილებები კრიტიკულად მნიშვნელოვანია იმისთვის, თუ როგორ შეძლებს ქვეყანა კლიმატის ცვლილებებთან გამკლავებას მომავალი წლების განმავლობაში.
გერმანია ერთ-ერთი იყო იმ 99 ქვეყანას შორის, სადაც გუშინ კლიმატის ცვლილებების საწინააღმდეგო აქცია გაიმართა. ორგანიზატორების განცხადებით, გლობალურ ღონისძიებას მსოფლიო 1 800-მდე მცირე და დიდი ქალაქი შეუერთდა.