აზერბაიჯანში დღეს „ხსოვნის დღეს“ აღნიშნავენ იმ ადამიანების მიმართ პატივისცემის გამოსახატად, რომლებიც მთიანი ყარაბაღის 2020 წლის ომს ემსხვერპლნენ.
ადგილობრივი მედიის ინფორმაციით, გარდაცვლილთა სულებს აზერბაიჯანში მდებარე მეჩეთებში, ეკლესიებსა და სინაგოგებში მოიხსენებენ. ადგილობრივი დროით 12:00 საათზე კი მათ ხსოვნას მთელი ქვეყნის მასშტაბით წუთიერი დუმილით მიაგებენ პატივს.
ომში დაღუპულების სულის მოსახსენიებელი ლოცვები ჩატარდება სომხეთის ტაძრებშიც. ამასთან, 11:00 საათზე დაღუპულებს წუთიერი დუმილით პატივს მთელი ქვეყნის ტერიტორიაზე მიაგებენ.
შეგახსენებთ, მთიან ყარაბაღში შეიარაღებული კონფლიქტი გასული წლის 27 სექტემბერს დაიწყო, რომელსაც ათასობით ადამიანის სიცოცხლე ემსხვერპლა. 44 დღიანი ომი 2020 წლის 9 ნოემბერს სომხეთის, რუსეთისა და აზერბაიჯანის ლიდერებს შორის გაფორმებული ცეცხლის შეწყვეტის შესახებ ხელშეკრულებით დასრულდა, რომელიც ძალაში 10 ნოემბრიდან შევიდა.