ქაბულის უნივერსიტეტის რექტორი მოჰამედ აშრაფ ღაირატი უარყოფს New York Times-ის მიერ გავრცელებულ ინფორმაციას, რომ უნივერსიტეტში ქალი სტუდენტები და ლექტორები აღარ დაიშვებიან.

რექტორი განმარტავს, რომ აკრძალვა დროებითია და მანამდე იმოქმედებს, სანამ ყველასთვის „ნამდვილი ისლამური გარემო“ არ შეიქმნება.

„New York Times– ის მიერ ჩემი სიტყვები ცუდად იქნა გაგებული. მე არ მითქვამს, რომ ჩვენ არასოდეს დავუშვებთ ქალებს უნივერსიტეტებში სასწავლებლად ან სამუშაოდ, მე ვიგულისხმე, რომ სანამ ისლამურ გარემოს არ შევქმნით, ქალებს მოუწევთ სახლში დარჩენა. ჩვენ ვმუშაობთ იმისთვის, რომ მალე შევქმნათ უსაფრთხო ისლამური გარემო,“ -წერს მოჰამედ აშრაფ ღაირატი „ტვიტერზე“.

„სანამ ყველასათვის ნამდვილი ისლამური გარემო არ იქნება უზრუნველყოფილი, ქალებს უნივერსიტეტში მოსვლის ან მუშაობის საშუალება არ ექნებათ. ისლამი უპირველეს ყოვლისა“, - განაცხადა ქაბულის უნივერსიტეტის რექტორმა.