აშშ-ის გაერთიანებული შტაბის ხელმძღვანელი მარკ მილი სენატის წინაშე წარსდგა, სადაც ავღანეთიდან ჯარების გაყვანის შესახებ ისაუბრა.

მისი თქმით, ევაკუაციამდე ყოფილ პრეზიდენტ დონალდ ტრამპს, მის შემდეგ კი ჯო ბაიდენს აფრთხილებდა, რომ ავღანეთიდან ჯარების სწრაფი გამოყვანა ქვეყნის მთავრობის კოლაფსს გამოიწვევდა.

გენერლის თქმით, 2020 წელს ტრამპსა და დაჯგუფება „თალიბანს“ შორის დადებული ხელშეკრულებიდან დაჯგუფებამ მხოლოდ ერთი შეასრულა.

„იმის გათვალისწინებით, რომ ახლა ქაბულში ხელისუფლებაში „თალიბანია“, აშკარაა, რომ ავღანეთში ომი იმ პირობებით არ დასრულებულა, რომელიც გვსურდა. ჯერ კიდევ გასარკვევია, შეძლებს თუ არა „თალიბანი“ ძალაუფლების კონსოლიდაციას. თუმცა, ჩვენ უნდა გავაგრძელოთ ამერიკის შეერთებული შტატებისა და მისი ხალხის ავღანეთიდან მომავალი ტერაქტებისგან დაცვა“, - განაცხადა მარკ მილმა.

გენერალმა ასევე აღნიშნა, რომ უახლოეს მომავალში „ალ-ქაიდას“ ან „ისლამური სახელმწიფოს“ მხრიდან აშშ-ზე თავდასხმის საფრთხე საკმაოდ რეალურია.