ანსამბლი „რუსთავი“ უკრაინაში საგასტროლოდ მიემგზავრება

საქართველოს ხალხური სიმღერისა და ცეკვის სახელმწიფო აკადემიური ანსამბლი „რუსთავი“ 2-31 ოქტომბერს უკრაინის ყველა დიდ ქალაქში კონცერტებს გამართავს. ქორეოგრაფიული დადგმა განახლებულია, რომლის პრემიერა უკრაინაში შედგება.

თავდაპირველად თბილისიდან უკრაინაში ანსამბლის მოცეკვავეები წავლენ, რომლებიც უკრაინის ანსამბლ „ვირსკისთან“ ერთად წარდგებიან მაყურებლის წინაშე.

ანსამბლ „რუსთავის“ სამხატვრო ხელმძღვანელის, გიორგი ნატროშვილის ინფორმაციით, „რუსთავის“ და „ვირსკის“ ერთობლივ კონცერტებს უკრაინის მაყურებელი კარგად იცნობს.

„ერთობლივი კონცერტები ადრეც გაგვიმართავს. პირველ განყოფილებაში უკრაინელები ასრულებენ ცეკვებს. მეორე განყოფილება კი, ანსამბლ „რუსთავს“ ეკუთვნის. საფინალო ცეკვა, კი ერთობლივია და ერთგვარი „შეჯიბრია“, რაც ძალიან მოსწონს მაყურებელს“,- აცხადებს გიორგი ნატროშვილი.

მისივე თქმით, 25 ოქტომბრიდან ქართველ მოცეკვავეებსა და მუსიკოსებს მომღერლებიც შეუერთდებიან, რომლებიც მაყურებლის წინაშე ახალ პროექტს „ბალადა სიყვარულზე“ წარუდგენენ. უკრაინის გასტროლის ბოლო 5 დღე სწორედ ანსამბლ „რუსთავის“ სოლო კონცერტებს დაეთმობა.

საგულისხმოა ისიც, რომ უკრაინაში გაიმართება ცეკვა „აფხაზურის“ პრემიერა, სადაც ნომერს მუსიკოსები, მომღერლები და მოცეკვავეები ერთად ასრულებენ.

„ამ მუსიკალურ ნომერში მოცეკვავეები ფაქტიურად ჰაერში ტრიალებენ და ულამაზესი სანახავია. „ცეცხლს ანთებენ“ მომღერლებთან და მუსიკოსებთან ერთად. ამ ნომერში რამდენიმე სოლო პარტიაა, რომლებსაც სხვებთან ერთად ეთნიკურად აფხაზი მოცეკვავე ქალ-ვაჟი ასრულებს. ისინი ჩვენი ანსამბლის ღირსეული და ნიჭიერი პროფესიონალები არიან“ , - აცხადებენ ანსამბლ „რუსთავის“ წარმომადგენლები.

პირველი კონცერტი უკრაინის ქალაქ ხარკოვში 3 ოქტომბერს გაიმართება.

ხათუნა ბურკაძე - დიდი სტრატეგიის შემუშავებით შევძლებთ ქვეყნის ინტერესების უზრუნველყოფას
ქართული პრესის მიმოხილვა 25.10.2021
მეთიუ ბრაიზა - მიხეილ სააკაშვილის დაბრუნებამ კრიზისული სიტუაცია კიდევ უფრო გაამძაფრა, მაგრამ ყოფილი პრეზიდენტის დაკავება არ იყო ჭკვიანური პოლიტიკური ნაბიჯი
თბილისი აუთლეტ ვილიჯი ცენტრალური და აღმოსავლეთ ევროპის საუკეთესო პროექტად დასახელდა
კახა ოქრიაშვილი - ბატონი სააკაშვილი ჰიტლერი რომ ყოფილიყო, 2011 წელს, როცა ბიძინა ივანიშვილმა პოლიტიკაში მოსვლის შესახებ განაცხადა, ყველა მხუთავი აირის კამერაში მოხვდებოდა