პეკინის ზამთრის ოლიმპიადაზე დასწრების უფლება მხოლოდ ჩინეთის მცხოვრებლებს ექნებათ და უცხო ქვეყნებიდან ჩასული გულშემატკივრები ღონისძიებას ვერ დაესწრებიან, - ინფორმაციას მედიასაშუალებები საერთაშორისო ოლიმპიურ კომიტეტზე დაყრდნობით ავრცელებენ.

ამასთან, დედაქალაქში ჩასულ ოლიმპიადის მონაწილეებს, რომლებიც სრულად ვაქცინირებულები არ არიან, 21- დღიანი კარანტინის გავლა მოუწევთ.

საერთაშორისო ოლიმპიურ კომიტეტში აცხადებენ, რომ ოლიმპიადის ყველა ადგილობრივ და საერთაშორისო მონაწილეს, ასევე სისტემაში დასაქმებულ ყველა ადამიანს კორონავირუსზე ტესტი ყოველდღიურად ჩაუტარდება.

ცნობისათვის, პეკინის ზამთრის ოლიმპიადა 4 თებერვალს იხსნება და 16 დღის განმავლობაში გაგრძელდება.