ეთიოპიის მთავრობამ გაერო-ს შვიდი თანამშრომელი პერსონა ნონ გრატად გამოაცხადა და ქვეყნის დასატოვებლად 72 საათი მისცა.
ამ გადაწყვეტილებას წინ უძღოდა გაერო-ს განცხადება იმის შესახებ, რომ ტიგრაის რეგიონზე, რომლის მოსახლეობას ჰუმანიტარული დახმარება ესაჭიროება, არასათანდო წვდომა აქვთ.
ამ განცხადების გამო, ეთიოპიის მთავრობამ გაერო ქვეყნის შიდა საქმეებში ჩარევაში დაადანაშაულა.
გაერო-ს გენერალურმა მდივანმა ანტონიო გუტერეშმა განაცხადა, რომ გაერო-ს თანამშრომლების გაძევების გამო „შოკირებულია“.
ტიგრაის რეგიონში ამბოხებულებსა და ფედერალურ ძალებს შორის დაპირისპირება 2020 წლის ნოემბრიდან მიმდინარეობს. კონფლიქტს დღემდე ათასობით ადამიანის სიცოცხლე ემსხვერპლა, განადგურდა და გაიძარცვა საგანმანათლებლო და სამედიცინო დაწესებულებები და რეგიონის მოსახლეობა უმძიმეს მდგომარეობაში აღმოჩნდა.