გაერთიანებულ სამეფოში, ბოლო ერთი თვის განმავლობაში, კოვიდ შეზღუდვების უმეტესობის გაუქმებისა და სკოლების გახსნის შემდეგ, ინფიცირების ყოველდღიურმა შემთხვევებმა იმატა, - ინფორმაციას The Guardian-ი ავრცელებს.
გამოცემის ცნობით, გაერთიანებულ სამეფოში, გასული 24 საათის განმავლობაში, კორონავირუსის 36 480 ახალი შემთხვევა გამოვლინდა და კიდევ 137 ადამიანი გარდაიცვალა, რაც სექტემბრის დასაწყისთან შედარებით მაღალი მაჩვენებელია. ამასთან, ბოლო 7 დღის განმავლობაში დაინფიცირების შემთხვევები წინა კვირასთან შედარებით 6.5%-ით გაიზარდა, თუმცა გარდაცვალების მაჩვენებელი 14%-ით შემცირდა.
გაერთიანებულ სამეფოში 49 მილიონ ადამიანს, ანუ მოზრდილი მოსახლეობის დაახლოებით 90%-ს, ვაქცინის პირველი დოზა მიღებული აქვს. 45 მილიონამდე ადამიანი, ანუ მოსახლეობის დაახლოებით 83% კი ორივე დოზითაა აცრილი.