„ქართული ოცნების“ გენერალური მდივნის, თბილისის მერობის კანდიდატის კახა კალაძის განცხადებით, თვითმმართველობის არჩევნები მშვიდობიან გარემოში ჩატარდა.
როგორც კალაძემ „ქართული ოცნების“ ოფისში გამართულ ბრიფინგზე განაცხადა, მთლიანად წინასაარჩევნო გარემო იყო მშვიდობიანი და ყველა პარტიას ჰქონდა შესაძლებლობა, ამომრჩევლისთვის საკუთარი ხედვები გაეცნო.
„არჩევნები ჩატარდა მშვიდობიან გარემოში. ზოგადად, მთლიანად საარჩევნო პროცესი, არა მხოლოდ არჩევნების დღე, ჩატარდა მშვიდობიან გარემოში. ყველა პოლიტიკურ პარტიას ჰქონდა შესაძლებლობა, ეწარმოებინა საარჩევნო კამპანია და საზოგადოებისთვის გაეცნოთ ხედვები და საარჩევნო პროგრამები, თუ ჰქონდათ ასეთი. დღევანდელმა დღემაც მშვიდობიან ვითარებაში ჩაიარა, თუ არ ჩავთვლით მიზანმიმართულ პროვოკაციულ მცდელობებს კონკრეტული ჟურნალისტებისა და ტელევიზიების მხრიდან. საბოლოო ჯამში ძალიან მნიშვნელოვანია, რომ ყველაფერმა მშვიდობიანად ჩაიარა“,- განაცხადა კალაძემ.