ინდოეთში, უტარ -პრადეშის შტატში, ფერმერების საპროტესტო აქციის დროს მომხდარი დაპირისპირების შედეგად მინიმუმ რვა ადამიანი დაიღუპა.

მედიის ინფორმაციით, ფერმერები იმ ადგილზე შეიკრიბნენ, სადაც შინაგან საქმეთა უმცროსი მინისტრი აჯაი მიშრა და შტატის უფროსი მინისტრის მოადგილე კეშავ პრასად მაურია უნდა მისულიყვნენ.

ქაოტური სცენები აჯაი მიშრას კოლონაში შემავალი ავტომობილების გარშემო განვითარდა.

გავრცელებული ინფორმაციით, გარდაცვლილებიდან 4 ფერმერია, 4 კი - ავტომობილებში მყოფი პირი.

ფერმერები ირწმუნებიან, რომ ერთ-ერთი ავტომობილი, რომელშიც მინისტრის შვილი იმყოფებოდა, აქციის მონაწილეებს განზრახ შეეჯახა, რის შედეგადაც 4 ფერმერი დაიღუპა. ამის შემდეგ დემონსტრანტებმა ავტომობილებს ცეცხლი წაუკიდეს, რასაც კიდევ 4 ადამიანის სიცოცხლე ემსხვერპლა.

აჯაი მიშრა ფერმერების ბრალდებებს უარყოფს და აცხადებს, რომ ისინი თავად დაესხნენ თავს კოლონას.

ინდოელი ფერმერები სოფლის მეურნეობის ახალ კანონებს აპროტესტებენ, რომლებიც ფერმერებს საკუთარი პროდუქციის დიდ კომპანიებზე მიყიდვის შესაძლებლობას აძლევს. ფერმერები შიშობენ, რომ ცვლილებები ფასების დაწევას გამოიწვევს და მსხვილი ფირმების გამდიდრებას შეუწყობს ხელს.