ბელარუსმა მიიღო გადაწყვეტილება, რომლის მიხედვითაც ევროკავშირთან რეადმისიის შეთანხმების მოქმედება წყდება. ამის შესახებ „რადიო თავისუფლების“ ბელარუსის რედაქცია იუწყება.
ბელარუსის წარმომადგენლობითმა პალატამ დოკუმენტი პირველი მოსმენით მიიღო, რის შემდეგაც, გადაწყვეტილება რესპუბლიკის საბჭომ დაამტკიცა.
პრეზიდენტმა ალექსანდრე ლუკაშენკომ შესაბამისი კანონპროექტი პარლამენტს 8 სექტემბერს წარუდგინა. მის განცხადებაში ნათქვამი იყო, რომ ქვეყანა ასე იქცევა ბელარუსისადმი ევროკავშირისა და მისი წევრი სახელმწიფოების არამეგობრული დამოკიდებულების გამო.
შეთანხმებას ბელარუსსა და ევროკავშირს შორის ხელი მოეწერა 2020 წლის იანვარში, რომელიც განსაზღვრავს პირების გადაცემის, მიღებისა და დაბრუნების მექანიზმს, რომლებმაც დაარღვიეს შესვლის ან ყოფნის პირობები და ექვემდებარებიან დეპორტაციას.