უკრაინის მმართველმა პარტიამ, „ხალხის მსახურმა“, პარლამენტის სპიკერ დმიტრო რაზუმკოვს უფლებამოსილება დროებით შეუჩერა.
უკრაინის პრეზიდენტ ვლადიმირ ზელენსკის პარტიის წევრების გადაწყვეტილებით, რომლებიც პარლამენტში უმრავლესობას წარმოადგენენ, დმიტრო რაზუმკოვს უფლებამოსილება ორი დღით შეუწყდება, ხუთშაბათს კი დეპუტატები მისი გადაყენების საკითხს უყრიან კენჭს.
დმიტრო რაზუმკოვი ვლადიმერ ზელენსკის მიერ ინიცირებული კანონმდებლობის სწრაფად მიღების წინააღმდეგი იყო, რომელიც პოლიტიკასა და ბიზნესზე ოლიგარქების გავლენის შემცირებას ისახავს მიზნად. მას სურდა კანონი, მიღებამდე, ვენეციის კომისიაში გადაეგზავნათ.
პარტია „ხალხის მსახურის“ ლიდერმა ალექსანდრ კორნიენკომ პარლამენტის თავმჯდომარე პარლამენტის დღის წესრიგის უკანონოდ დაბლოკვაში დაადანაშაულა.
შეგახსენებთ, უკრაინის პარლამენტმა ოლიგარქების შესახებ კანონი სექტემბერში მიიღო.