22 წლის ნიკა კვარაცხელიას მკვლელობაში ბრალდებული გიორგი კავილაძის ადვოკატის, გიორგი ტურაზაშვილის განცხადებით, მისი დაცვის ქვეშ მყოფი მოინახულა და მას ჯანმრთელობისა და უსაფრთხოების კუთხით პრობლემები არ აქვს.
ადვოკატის თქმით, დაკავებისას პოლიციის მხრიდან ზეწოლას ადგილი არ ჰქონია.
„მას შემდეგ, რაც შინაგან საქმეთა სამინისტრომ გააკეთა განცხადება დაკავებასთან დაკავშირებით, ბუნებრივია, საქმეებიდან გამომდინარე ზოგადად ინფორმაციას უნდა ადევნოს თვალყური ამ შემთხვევაში თვითონ ადვოკატმაც და ჩემთვის გახდა ცნობილი, რომ დააკავეს კავილაძე, ჩემი დასაცავი პირი. ამ შემთხვევაში, მე უბრალოდ გადავწყვიტე, რომ უსაფრთხოების და ჯანმრთელობის გადასამოწმებლად მონახულება, პოლიციის შესაძლო ზეწოლა ხომ არ იყო, მანამდე დაკავების პროცესში ხომ არ იყო რაიმე ჯანმრთელობის დაზიანების პრობლემა. არცერთი არ აღმოჩნდა. შევხვდი, მოკლე შეხვედრა იყო, თავად მას ვესაუბრე და პოლიციელებსაც, იქ სამმართველოს ხელმძღვანელობა ვინც იყო. რაიმე მსგავსი არ არის, მშვიდობაა ჯანმრთელობის და უსაფრთხოების კუთხით”, - განაცხადა გიორგი ტურაზაშვილმა.
მისი თქმით, აპირებს კიდევ ერთხელ და ამჯერად უფრო ხანგრძლივად შეხვედრას, რათა გააცნოს არსებული ვითარება და მისი აზრიც მოისმინოს.
„ბადრაგირება მოხდა მისი რუსთავის მე-6 პენიტენციურ დაწესებულებაში, სადაც ვფიქრობ ვნახო ხვალ, მიუხედავად იმისა, რომ კარანტინული რეჟიმები აქვთ პანდემიიდან გამომდინარე. ვფიქრობ, მაინც ვცადო შეხვედრა. საქმის მასალების ანალიზი მაქვს სრული გაკეთებული, ამ მოცემულობით რაც მაქვს. ხვალ ვნახოთ რამდენად ხანგრძლივი შეხვედრა იქნება და სურვილი და მიზანი მაქვს, რომ ცოტა ხანგრძლივი შეხვედრა მქონდეს, მაგალითად საათზე მეტიც, რომ გავაცნო მოცემულობა და ბრალთან დაკავშირებით მერე ვისაუბროთ და მოვისმინო მისი პოზიცია, რაც გაეცნობა სრულ ინფორმაციას, რა მდგომარეობაა მის ირგვლივ”, - განაცხადა გიორგი ტურაზაშვილმა.