რუსეთმა უპასუხა ქიმიური იარაღის აკრძალვის ორგანიზაციის წევრების შეკითხვებს ალექსეი ნავალნის საქმესთან დაკავშირებით, - მედიის ინფორმაციით, ამის შესახებ რუსეთის მუდმივმა წარმომადგენელმა ორგანიზაციაში, ალექსანდრ შულგინმა განაცხადა.
„რუსეთმა ღირსეული და იურიდიულად დაკალიბრებული პასუხი გასცა 45 სახელმწიფოს მოთხოვნას, ” - აღნიშნა მან, თუმცა არ დაუკონკრეტებია, რა პასუხი გასცეს შეკითხვებს.
ალექსანდრ შულგინის თქმით, მოსკოვმა გერმანიის, საფრანგეთის, შვედეთისა და ორგანიზაციის ტექნიკური სამდივნოსადმი საპასუხო მოთხოვნა წარადგინა.
„ჩვენ კიდევ ერთხელ გადავეცით კითხვების მთელი ჩამონათვალი გერმანიას, საფრანგეთს და შვედეთს ამ ტალახიან ისტორიასა და მათ მიერვე დადგმულ ამ სპექტაკლში მათი როლის შესახებ. ველოდებით ამომწურავ და საფუძვლიან პასუხებს,“- აღნიშნა რუსეთის წარმომადგენელმა.
შეგახსენებთ, 45-მა ქვეყანამ ალექსეი ნავალნის საქმეთან დაკავშირებული შეკითხვები რუსეთს ქიმიური იარაღის აკრძალვის ორგანიზაციაში ორი დღის წინ გადასცა და 2020 წლის 20 აგვისტოს პოლიტიკოსი მოწამვლის შესახებ განმარტება მოსთხოვა.