რომში შეტაკებების შედეგად, რომელიც მთავრობის წინააღმდეგ ,,მწვანე საშვების“ რეგულაციის გამო დაიწყო, 12 ადამიანი დააკავეს. მათ შორის ულტრამემარჯვენე პარტიის ,,ფორზა ნუოვოს“ წარმომადგენლებიც იყვნენ. ამის შესახებ ინფორმაციას Reuters ავრცელებს.

ათასობით ადამიანი დედაქალაქის ქუჩებში ახალი რეგულაციის გასაპროტესტებლად გამოვიდა. დემონსტრანტებმა პოლიციელების კორდონის გარღვევა და ქვეყნის პრემიერ-მინისტრ მარიო დრაგის ოფისამდე მიღწევა სცადეს.

შეტაკება მოხდა იტალიის მთავარი პროფკავშირების შენობასთანაც.

იტალიის მთავრობის გადაწყვეტილებით, დასაქმებულები, რომლებიც 15 ოქტომბრამდე სამსახურში კოვიდპასპორტებს არ წარადგენენ, ანაზღაურებას ვერ მიიღებენ. იტალიაში 12 წელს ზემოთ მყოფი ადამიანების 80 %-ზე მეტია აცრილი.