სამწუხაროდ, ირანის საგარეო საქმეთა სამინისტრო არ წყვეტს აზერბაიჯანის წინააღმდეგ ცილისმწამებლურ კამპანიას. ჩვენ კატეგორიულად უარვყოფთ ასეთ ბრალდებებს, - ამის შესახებ აზერბაიჯანული მედიის ინფორმაციით, ქვეყნის საგარეო უწყების პრესმდივანმა ლეილა აბდულაევამ განაცხადა.
მისივე თქმით, 44-დღიანი ომის დროს აზერბაიჯანში არ ყოფილა ტერორისტი და არც ახლაა.
„აზერბაიჯანის ტერიტორიაზე არასოდეს ყოფილა ადგილი ტერორისტებისთვის,“- აღნიშნა აბდულაევამ.
მისი თქმით, აზერბაიჯანმა საკუთარი ტერიტორიები ოკუპაციისგან გაათავისუფლა „სისხლისა და მოწამეთა სიცოცხლის ფასად“.
„როგორც პრეზიდენტმა ილჰამ ალიევმა აღნიშნა, აზერბაიჯანს, რომელსაც 100 000 -ზე მეტი ჯარისკაცისგან შემდგარი არმია ჰყავს, არ სჭირდება დაქირავებული მებრძოლები,“- აღნიშნა აბდულაევამ.
მისი თქმით, აზერბაიჯანის საწინააღმდეგო კამპანია ირანს სარგებელს არ მოუტანს.
„ანტიაზერბაიჯანული კამპანია ირანს სარგებელს არ მოუტანს. ნათელია, რომ უსაფუძვლო პრეტენზიების მიზეზი აზერბაიჯანის ტერიტორიაზე ირანის სატვირთო მანქანების უკანონო შესვლის აღკვეთა და აზერბაიჯანის ტერიტორიების ოკუპაციისგან გათავისუფლებაა,“- აღნიშნა აზერბაიჯანის საგარეო უწყების წარმომადგენელმა.