„თალიბანმა“ და ევროკავშირის წარმომადგენლებმა ყატარის დედაქალაქ დოჰაში მოლაპარაკებები გამართეს, - ინფორმაციას „დოიჩე ველე“ ავრცელებს.
შეხვედრის წინ ევროკავშირის საგარეო პოლიტიკის ხელმძღვანელმა ჯოზეფ ბორელმა განაცხადა, რომ ბლოკს სურს, ავღანელ ხალხს პირდაპირი დახმარება გაუზარდოს, რათა ქვეყანას კოლაფსი ააცილოს თავიდან.
„არ შეგვიძლია დაველოდოთ და ვნახოთ. ჩვენ უნდა ვიმოქმედოთ და ვიმოქმედოთ სწრაფად“, - აღნიშნა ბორელმა.
„თალიბანის“ მოქმედი საგარეო საქმეთა მინისტრის, ამირ ხან მუთაქის განცხადებით, მათ მთელს მსოფლიოსთან პოზიტიური ურთიერთობა სურთ.
„მიგვაჩნია, რომ ასეთ დაბალანსებულ ურთიერთობას ავღანეთის არასტაბილურობისგან გადარჩენა შეუძლია“, - აღნიშნა მან.
ევროკავშირის პრესსპიკერმა ნაბილა მასრალმა განმარტა, რომ მოლაპარაკებები არაფორმალური ხასიათის ტექნიკური დონის შეხვედრას წარმოადგენს და ავღანეთის დროებითი მთავრობის აღიარებას არ ნიშნავს. მისი თქმით, მხარეები, სხვა საკითხებთან ერთად, ჰუმანიტარული დახმარების ხელმისაწვდომობასა და ქალთა უფლებებს განიხილავენ.