რუსული მედიის ინფორმაციით, მოსკოვის პოლიციამ წინასაგამოძიებო მოკვლევა დაიწყო მას შემდეგ, რაც რუსეთის ფედერაციაში შვეიცარიის საელჩოს საქართველოს ინტერესების სექციაში, ოკუპირებული აფხაზეთის "საელჩოსა“ და ალჟირის საელჩოში აფეთქებების საფრთხის შესახებ ინფორმაცია მიიღო.

წყარომ სააგენტო TASS- ს განუცხადა, რომ ინფორმაცია ნაღმების არსებობის შესახებ ყალბი აღმოჩნდა.

წყაროს თქმით, დედაქალაქის პოლიციის განყოფილებას ელექტრონული ფოსტის საშუალებით შეტყობინება მამაკაცმა გაუგზავნა, რომელიც იმუქრებოდა, რომ „მოსკოვში დიდ სპექტაკლს“ დადგამდა თანამზრახველების საშუალებით „ალჟირის, აფხაზეთისა და საქართველოს საელჩოებში“ ბომბების დადებით.

მამაკაცი ასევე დაიმუქრა სამი სტადიონისა და ვნუკოვოს აეროპორტის აფეთქებით,

„სპეციალისტებმა აღნიშნული ობიექტების შემოწმება განახორციელეს, თუმცა ასაფეთქებელი მოწყობილობა ან ასაფეთქებელი ნივთიერება ვერ აღმოაჩინეს. შემოწმების დროს ევაკუაცია არ განხორციელებულა. "დანაღმვის" შესახებ ინფორმაცია ყალბი აღმოჩნდა. ამ ფაქტზე, წინასწარი გამოძიება დაიწყო”, - აღნიშნა წყარომ.