აშშ-ის სურსათისა და მედიკამენტების ადმინისტრაციის ვაქცინების და მასთან დაკავშირებული ბიოლოგიური პროდუქტების საკონსულტაციო კომიტეტმა „ჯონსონ ენდ ჯონსონის“ ვაქცინის მეორე დოზით აცრის რეკომენდაცია გასცა.

„ვხედავთ, რომ ეს არის ჯგუფი უფრო დაბალი ეფექტურობით, ვიდრე mRNA ვაქცინების („ფაიზერი“, „მოდერნა“) შემთხვევაში დავინახეთ, ამიტომ არსებობს იმის აუცილებლობა, რომ რაღაც მოვიმოქმედოთ“, - აღნიშნა ეპიდემიოლოგმა არნოლდ მონტომ, რომელიც კომიტეტის შეხვედრას თავმჯდომარეობდა.

რეკომენდაციის თანახმად, ვაქცინის მეორე დოზით უნდა აიცრას 18 წლის ასაკის ზემოთ ყველა ის პირი, რომელიც პირველი დოზით მინიმუმ 2 თვის წინ აიცრა.

სურსათისა და მედიკამენტების ადმინისტრაცია ვალდებული არ არის, კომიტეტის რეკომენდაციას მიჰყვეს, თუმცა, როგორც წესი, უწყება მის რეკომენდაციებს ეთანხმება.